|
На 21-22.11..2016 година во Скопје се одржа презентација на Кодексот на судиска етика за судиите во Република Македонија, во организација на Здружението на судиите на Република Македонија и Академијата за судии и јавни обвинители „Павел Шатев“, со финансиска поддршка од ИПА – проектот 2010 – „Понатамошна поддршка за независно, одговорно, стручно и ефикасно судство и унапредување на пробациската служба и алтернативните мерки.“
Презентацијата се одржа во присуство на судии и јавни обвинители од четирите апелациони подрачја, претставници на Адвокатската комора на РМ, Нотарската комора на РМ, Комора на извршители на РМ, како и претставници на невладини организации чие делување е во областа на демократија и владеење на правото.
За досегашните искуства од практичната имплементација на Кодексот говореше судијата Шпенд Деваја од Врховен суд на Република Македонија и член на Управен одбор на Здружението на судии на РМ. Директорката на Академијата за судии и јавни обвинители „Павел Шатев“ се задржа на препораките на ГРЕКО од 4-тиот круг на оценка кој бара да се формира советодавно тело кое ќе ги советува судиите во случај кога имаат етички дилеми.
За искуствата од Р.Хрватска зборуваше г-дин Ѓуро Сеса, судија на Врховен суд на Р.Хрватска и претседател на Здружението на судии во Р.Хрватска, а г-ѓа Нина Бетето, судија во Врховен суд на Р.Словенија ги пренесе тамошните практики и препорача етичките стандарди да ги донесуваат самите судии.
|