ЗСРСМ

Дата: 23.07.2025

Здружението на судии на РСМ и Основниот кривичен суд Скопје денеска потпишаа Меморандум за соработка со Приватна високообразовна институција Бреинстер Некст Скопје со цел воведување нови дигиталните алатки во Кривичниот суд, за поголема ефикасност и економичност на постапките и полесен пристап на граѓаните до услугите во надлежност на судовите. Студентите на Бреинстер Некст, кои ќе посетуваат практична настава во Судот, ќе работат на воведување нови апликации преко кои со помош на Вештачка интелигенција ќе овозможат: - Алатка за пренесување на аудио записите од главните расправи во текстуална форма ( speech to text ) на македонски јазик, - Унапредување на технологијата за аудио и видео снимање на главните расправи - Посебна апликација за директно и брзо анонимизирање на судските пресуди и - Унапредување на веб страната на судот и поголема достапност на судот преку социјалните мрежи. Меморандумот опфаќа и соодветна заштита на податоците, па така студентите нема да имаа директен пристап во судскиот систем и увид во не правосилни предмети, а воедно ќе се запазат и сите Законски одредби за заштита на личните податоци на странките и доверливоста на постапките. Соработката со академијата е иницирана пред се заради олеснување на работата на судиите и судската служба со користење на Вештачката интелигенција, побрз пристап до правдата и ефикасно водење на постапките со целосно почитување на Законските одредби од ЗКП и Законот за судови. Но, воедно е од особен интерес за транспарентноста и отчетноста на судот и збогатување на фондот на објавени пресуди кои ќе бидат од интерес како за медиумите и невладините организации така и за збогатување на судската пракса.

Дата: 04.07.2025

Претседателот на Здружение на судиите на Република Северна Македонија судија Иван Џолев одржа работен состанок со г-ѓа Cecilia Maronnier меѓународен експерт во Министерството за правда од EXPERTISE FRANCE, француска агенција за меѓународна техничка експертиза и г-ѓа Rachelle Ganeme меѓународен експерт која работи во седиштето на EXPERTISE FRANCE во Париз задолжена за соработка со земјите од Западен Балкан за прашања поврзани со судството, владеењето на правото, борбата против котупцијата. На состанокот се разговараше за идни активности и зајакнување на билатералната соработка во областа на правосудниот сектор. Меѓу приоритетите кои Претседателот на Здружение на судиите, судија Иван Џолев ги нагласи се неопходните реформи во правосудниот сектор, потребата од вложување во кадровските капацитети во судовите во државата, независно судство и независен судски буџет.

Дата: 30.04.2025

Здружението на судии на РСМ во соработка со Мисијата на ОБСЕ во Скопје, ја одржа годишната судиска конференција на тема „Зајакнување на судската независност и одговорност преку поголема ефикасност на постапката“ на која свое обраќаме имаа Шефот на Мисијата на ОБСЕ во Скопје - Килиан Вал, Претседателот на ЗСРСМ – Иван Џолев, Претседателот на Судскиот совет на РСМ – Александар Камбовски, ВД Претседателот на Врховниот суд на РСМ – Џемали Саити, а во текот на дискусијата со совие предложи и идеи за унапредување на работата на судовите учествуваа и Претседателите на подружниците на ЗСРСМ. - Судиската власт ги штити основните човекови права и слободи, обезбедува еднаквост, рамноправност и недискриминација. Го штити правниот поредок и обезбедува правна сигурност, владеење на правото и ја оценува Законитоста во постапувањето на граѓаните. Во тој правец, како носители на трета власт, и Ние бараме еднаков, рамноправен и не дискриминирачки однос од државата каде сме решиле да ја градиме и надградуваме нашата професионална кариера и со непристрасност, независност и професионалност да допринесе ме за обезбедување на Уставноста и Законитоста. Воедно бараме и еднаквиот и не дискриминирачки однос кон судиите да се преслика и кон судската служба без која судовите не можат да излезат во пресрет на предизвиците. Заради тоа Здружението поведе втора иницијатива пред Уставниот суд на РСМ за оценување на Законот за плати на судиите, како и барање до надлежните инситуции за итна интервенција во кадровската ослабеност на судовите – истакна Претседателот на Здружението, судија Иван Џолев. - „Посветени сме на подобрување на процедуралната ефикасност и на обраќање внимание на системските одлагања кои ја поткопуваат правдата. Ова го правиме со обновен фокус вметнат во нашата новоусвоена тригодишна стратегија, која ги преструктуира нашите напори кон насочени приоритети кои носат поголем ефект. Преку легислативна реформа, посилна координација во областа на правдата и долготрајна инвестиција во институционалните капацитети за поддршка на правен систем кој испорачува: ефикасно и правично“, истакна амбасадорот Килиан Вал, шеф на Мисијата на ОБСЕ во Скопје.

Дата: 11.03.2025

Здружение на судиите на Република Северна Македонија го честита изборот на новите судии, на вчерашната седница на Судскиот совет на РСМ, а кои ќе постапуваат во повеќе Основни судови во земјата. Во секое демократско општество судиите се „чувари“ на Уставно загарантираните права и слободи на граѓаните и гарант на правната сигурност во една земја. Заради тоа Здружението ги охрабрува ново избраните судии да постапуваат независно, совесно и непристрасно, водејќи се од принципите на владеењето на правото и правичноста. Само со беспрекорна професионалност и чесност ќе ја заслужите довербата на граѓаните и ќе придонесете за унапредување на правосудниот систем. Вашата професионална патека отсега носи голема одговорност, бидејќи Вие сте иднината на третата власт и само со личниот и професионален интегритет, имуни на сите општествени влијанија, транспарентни и видливи пред јавноста, можете да допринесете во зајакнувањето на довербата во правниот систем и зајакнувањето на демократските принципи. Нека Вашиот судиски мандат биде воден од мудроста, правичноста и цврстата посветеност на Законот. Воедно како Здружение го честитаме и потегот на членовите на Судскиот совет на РСМ, кои и покрај сите политички случувања, беа доследни и професионални во нивната работа и со изборот на нови судии го намалија недостигот на судии во системот кој во последните години макотрпно се справува со приливот на предмети и недостигот на стручен и професионален кадар. Со тоа дадоа и свој допринос во исполнување на роковите дадени од Европската комисија за унапредување на Судскиот систем, од кои реформи зависи и финансиската поддршка од ЕУ во износ од околу 800 милиони евра за земјата. Здружението на судии на РСМ, упатува апел до ново избраните, но и до сите актуелни судии, дека само обединети, професионални и независни можеме да ги оствариме целите на дадената судиска заклетва, а тоа е да ги штитиме правата и слободите на граѓаните во чие име постапуваме и носиме пресуди. Заради тоа Здружението ги повикува ново избраните судии, да се приклучат на нашата организација и со нови идеи и препораки да допринесат во унапредување на соработката со Извршната и Законодавната власт, Меѓународните организации во земјата, невладиниот сектор, медиумите и академската заедница како клучни фактори во градење на јавното мислење и довербата на граѓаните во системот. Со почит ЗСРСМ.