ЗСРСМ

Дата: 06.02.2025

Изразувајќи искрено жалење за загубата на млад човечки живот, каде ниту еден збор не може да ја ублажи болката на семејството и блиските, ниту да ја надомести трагедијата што не потресе сите нас, Здружение на судиите на Република Северна Македонија сочувствува, но истовремено и изразува загриженост за фактот што поедини судии се дискредитираат во јавноста, без притоа да се почитуваат принципите на правна сигурност и пресумпцијата на невиност. Здружението во целост се согласува и ја поддржува Подружницата на ЗСРСМ колегите од Основниот кривичен суд Скопје, во нивното барање за разумност и рационален пристап во согледување на евентуалните пропусти кај институциите, како и поддршка на граѓаните во нивното барање, исклучиво за Системски промени и зголемување на безбедноста на граѓаните, но и доследно почитување на Уставот и Законите. Јавната осуда на судија не смее да биде иницирана и поткрепена од непотврдени шпекулации, односно без претходно да биде утврдена личната и професионална одговорност на судијата во конкретен случај. Повикуваме на внимателен и одговорен пристап од сите општествени гласноговорници во носењето на вакви одлуки, со цел да се зачува независноста на судската власт и да се избегнат непотребни политички или јавни притисоци врз носителите на правосудните функции. Вината за системските проблеми во сообраќајот не може да се припише на судството, бидејќи сообраќајните несреќи се комплексен општествен проблем поврзан со инфраструктурата, превенцијата и свеста на учесниците во сообраќајот.

Дата: 30.01.2025

Здружение на судиите на Република Северна Македонија денеска ја презентираше Анкетата за задоволство на корисниците на судските услуги, изработена од Коалицијата „Сите за правично судење“. Анкетата беше презентирана пред претставници на сите судски институции, Министерството за правда и медиумите.

Дата: 08.12.2024

Здружение на судиите на Република Северна Македонија и Здружение на судиите „Форум на судии на Србија“ како стручни, невладини и непрофитабилни здруженија кои го промовираат и зајакнуваат угледот и независноста на судската власт, склучија ПРОТОКОЛ ЗА СОРАБОТКА. Протоколот за соработка е со цел стручна, едукативна и истражувачка соработка на двете Здруженија, размена на искуства и најдобри практики за унапредување на работата, довербата и авторитетот на судиите во двете земји. Соработката на двете Здруженија во иднина треба да биде поттик за регионално вмрежување на судските здруженија што е дел од заклучоците донесени на VIII- мата Регионална судиска конференција во Охрид, РСМ, на тема „Унапредување на довербата и авторитетот на судската власт преку поголема независност и транспарентност“

Дата: 07.12.2024

 VIII РЕГИОНАЛНА СУДИСКА КОНФЕРЕНЦИЈА Здружението на судии на Република Северна Македонија, во соработка со Институтот на CEELI од Прага, а подржани од Амбасадата на САД во Скопје, од 04 до 06 декември 2024 година ја организирање VIII- мата Регионална судиска конференција во Охрид, РСМ, на тема „Унапредување на довербата и авторитетот на судската власт преку поголема независност и транспарентност“ На конференцијата учествуваа судии од сите судски институции во земјата, судии од регионот – Хрватска, Србија, Босна и Херцеговина, и Црна Гора како и претставници на Институтот CEELI од Србија и Косово. Воедно, за првпат на една судиска конференција организирана од Здружението на судии на РСМ, свои излагања на темата имаа и претставници на невладиниот сектор, Универзитетскиот професорот Бобан Мисовски и претставниците на Судско медиумскиот совет. Од плодните излагања, дискусии и презентации на Конференцијата произлегоа следните заклучоци, кои во следниот период ќе бидат водилка на Здружението за унапредување на судската власт, поголема достапност на правдата, и зголемување на довербата кај граѓаните во судскиот систем.Закличоци - 1. Учесниците на конфенцијата се согласни дека aктивностите na здружението и на сите општествени чинители треба да бидат насочени кон достигнување на уставно определена еднаквост на трите власти (Законодавна, извршна и судска). 2. Конференцијата заклучи дека се потребни континуирани напори за обезбедување на судската независност и самостојност, преку зголемен судски активизам, изразен преку активности на Здружението и на секој судија поединечно. 3. Да се инсистира на финансиска независност на судскиот систем и подобрување на материјалниот статус на судиите но и на судската служба како предуслов за фунцкионирање на системот. 4. Потребно е да се продолжи со унапредувањето на транспарентноста како предуслов за зголемување на довербата во судството и зголемен проактивен пристап во односите со јавноста. 5. Континуирана анализа на состојбите во судството преку анкетирање на странките во постапките и корисниците на судските услуги, заради навремена детекција на недостатоците во судското постапување. 6. Конференцијата смета дека треба да се оживее идејата за меѓурегионално вмрежување на судските здруженија и судиите, а поради размена на искуства и надминување на проблеми од иста природа. 7. Проактивно учество на судиите во измните на Законите и подзаконксите акти кои ја регулираат работата на судовите, пристапот до правдата и казнената политика. Во прилог фото глаерија од Конференцијата: